Norsk Smaksskule 2018/19 nærmar seg med stormsteg, og skal vi tru kokken på Vianvang kan dei 200 skule- og barnehagetilsette sjå fram til inspirerande dagar. Foto: Ingrid Blessom / Norsk Kulturarv)
I år er det 5 år sidan Norsk Smaksskule hadde sitt fyrste kurs for skule- og barnehagetilsette. I løpet av hausten passerar kompetansehevingsprogrammet 1000 deltakarar. Interessa har i år, som tidlegare år, vore formidabel. Dette har gjort at det er opp mot 100 på venteliste til årets kurs. Kursa går føre seg i Lom, Haugesund, Trondheim og Oslo kor det er to kurs.
Kurshaldarane til hausten er Einar Risvik, Arne Brimi, Ståle Johansen, Frode Selvaag, og Jørn Lie. Vi spurte initiativtakar til Norsk Smaksskule, Arne Brimi kva deltakarane på haustens kurs kan vente seg.
– Dei som kjem til kurs hjå meg og dei andre kurshaldarane i smaksskulen kan gle seg på kurs kor matglede, trivsel og inspirasjon skal stå i sentrum, seier kokken frå Lom. – Smak og mat skal vera 'løyle' – og det skal vera eit høgdepunkt i kvardagen. I sommar har eg møtt mykje folk, og eg blir imponert over kor stor kunnskap mange nordmenn har om mat. Samstundes er det også skremmande å sjå kor lite mange andre veit om mat. Det har utvikla seg eit stort skilje mellom folk som har kunnskap og kompetanse om mat, råvarer og smak og kva maten gjer med kroppen vår og dei som ikkje har det, seier Arne Brimi. – Norsk Smaksskule ønskjer å vera med å bidra til den oppveksande generasjonen i Norge kan ta gode, kvalifiserte valg. Eg trur ikkje ein kan undervurdere kor viktig gode matvaner er for trivsel og livskvalitet. Vi i Norsk Smaksskule er redde for at trenden med barnemenyar og fast food til ungar skal utvikle seg – og vi ønskjer å bidra til det motsette.
Kursa til hausten fell på følgjande datoar:
Oslo: 20.-21. august
Haugesund: 23.-24. august
Lom: 27.-28. august
Oslo: 30.-31. august
Trondheim: 6.-7. september